تالف وبغيتي تنجح؟

إذا ما عندكش رؤية واضحة، ولا حتى هدف محدد، غادي تلقى راسك كل يوم كتفيق على نفس الروتين، كتحاول تطفي المشاكل وحدة بوحدة، وكتدور فحلقة مفرغة بلا نهاية. فهاد الوضع، أحسن حاجة تقدر توصل ليها هي أنك تبقى واقف فبلاصتك... هذا إلا ما رجعتيش اللور.

الحياة كتحتاج وقفات صادقة من وقت لآخر. وقفات كتشوف فيها فين واقف، وفين باغي توصل، وكيفاش توصل لهذ الهدف. هاد المراجعة كتساعدنا نحددو خطواتنا، ونوجهو طاقتنا فالاتجاه الصحيح بلا تشتت.

مثال بسيط: فكر فواحد الطالب اللي باغي ينجح فدراستو. إلا ما حددش هدف واضح بحال النجاح بميزة مزيانة ولا التخصص فمجال معين، غادي يبقى غير كيقرا بلا حماس، وكيضيع الوقت فحوايج ماعندهومش علاقة بدراستو. ولكن إلا حط هدف واضح، غادي ينظم وقتو، يركز فالدروس المهمة، ويبحث على فرص باش يطور مهاراتو.

نفس الشيء كيطبق على ريادة الأعمال. شخص بغا يبدا مشروعو الخاص، ولكن ما عندوش رؤية واضحة ولا خطة عمل. غادي يلقى راسو متشتت بين أفكار مختلفة، وما غاديش يقدر يحقق تقدم ملموس. ولكن إلا جلس وخطط، وحدد أهداف قصيرة وبعيدة المدى، غادي يعرف فين غادي ويوجه مواردو بشكل صحيح.

حتى فالعلاقات الشخصية، بحال الصداقة ولا العائلة، إلا ما كناش عارفين شنو بغينا نبنيو، غادي نبقاو ندورو فدوامة ديال سوء الفهم. ولكن إلا حددنا أننا بغينا علاقات مبنية على الثقة والتفاهم، غادي نخدمو على التواصل ونكونو حاضرين للناس اللي كنهتمو بيهم.

ماشي غير الخدمة اللي كتحتاج لهذ الرؤية، هاد الكلام كينطبق على جميع جوانب حياتنا: التعليم، الرياضة، وحتى فالنشاطات اللي كنمارسوها باش نرتاحو ونحسو بالمتعة بحال السفر. مثلاً، إلا سافرت بلا خطة ولا وجهة محددة، ممكن تستمتع شوية، ولكن غادي تضيع الوقت والفلوس بلا ما تستافد كامل الاستفادة. ولكن إلا خططتي للسفر، وحددتي الأماكن اللي باغي تزورها والأشياء اللي باغي تديرها، غادي تكون التجربة أغنى وأمتع.

ما كاينش هدف بلا استراتيجية، وما كاينش سعادة حقيقية بلا رؤية. كون ديما متأكد، أن كل خطوة كتاخدها عندها معنى، وكل قرار كتاخدو خاصو يكون موجه لهدف. الحياة كتعطي بزاف للي عارف فين باغي يوصل، وخاصك غير تحدد الطريق وتثيق فاختياراتك.

نصحية: خد ورقة وستيلو، وكتب الأهداف ديالك، حتى إلا كانوا صغار. قسمهم لأهداف قصيرة المدى وبعيدة المدى. خطط كيفاش توصل ليهم، وحدد الموارد اللي غادي تحتاج. كل مرة تحقق هدف، احتفل بنفسك وخد دافع باش تكمل للهدف اللي من بعد.

خد وقفات ديال التفكير من وقت لآخر، خدم عقلك، خطط بحكمة، وتحرك بجرأة. لأن الحياة بلا رؤية، بحال سفينة وسط العاصفة بلا بوصلة... والنجاح كيبدا من هنا، من وضوح الطريق.

خلاصة: حدد الأهداف ديالك، خطط باش توصل ليهم، وخدم بجد. الطريق ممكن يكون صعيب، ولكن بالاستمرارية والإصرار، غادي توصل. الحياة فرصة وحدة، وخاصنا نستغلوها بأحسن طريقة.

محمد الغيساني

مؤسس، مستثمر، وكاتب سلسلة الأربعين.