بعد الطلاق بالتراضي مع سلطانة، هاذي قصة الزواج عن حب من Next Media

من بعد ما قررت نطلق سلطانة ونرجع لحرفتي الأصلية فالديفلوبمون، تم الاستحواذ عليها من طرف مجموعة أخبار اليوم. كانت أول شركة نصايبها ونبيعها، وبداية جديدة بالنسبة ليا. أسست شركة جديدة سميتها Next Media. العلاقات اللي بنيتها فتحت ليا بزاف ديال الأبواب، وقدرت نكون شراكات جديدة.

البداية كانت مع اليوم 24 وسلطانة، وكانو هما أول الكليان عندنا، تكلفنا بكل ما هو تقني، وصايبنا مواقع سباقة لزمانها من ناحية التصميم والتوافق مع محركات البحث والسوشيال ميديا.

الفريق ديالنا بقى هو نفسو من أيام اليوم 24، ولكن كان خاصنا نبدلو العقلية ديالنا كاملين. ونتحولو من فريق كيخدم على بروجي واحد لفريق كيقدر يسير بزاف ديال المشاريع. كنا بحال العائلة، نضحكو ونخدمو ونلعبو مجموعين. شحال من نهار دوزناه فالضحك واللعب، من Baby Foot للبلايستيشن. كنا متحمسين ننجحو ونعيشو الحياة بكل تفاصيلها.

فطرف ثلاث سنين، قدرنا نخليو اسم Next Media على كل لسان فعالم المقاولات الصحفية. كان لينا الشرف نصممو أكبر وأهم المواقع الإخبارية فديك الفترة: MEDI1TV، شوف تيفي، لكم، العمق، منارة، تيل كيل، ميد راديو، كيفاش، L'Observateur ..إلخ. ولّينا أول وكالة فالمغرب من ناحية النجاح فالوصول للزبناء فعالم الصحافة.

واحد الحاجة اللي كنت فرحان بيها هي أني تعلمت نجمع الأضداد ونبيع نفس الخدمة فنفس السيكتور. كنت خدام مع ناس بيناتهم حروب كبيرة، ولكن فخدمتي كنا كنركزو على المهنية ونخليو الأمور الأخرى فجنب. النصيحة اللي نقدر نعطي لأي واحد هي يركز على مجال واحد، يعطيه الوقت والجهد كامل، ويصبر. أكيد غادي يولي هو الأول فيه.

وسط هاد العدد الكبير من الكليان والفواتير، بدات المشاكل المالية كتبان بسبب التأخيرات فالدفع. كل بروجي كنا تنصايبوه، تنسناو بالأشهر باش نتخلصو. المصاريف كانت كبيرة: الأجور، الكراء... وبالخصوص نهار بداو المعلنين الكبار اللي كانت الصحافة هي الوسيلة الإعلانية الوحيدة ديالهم كيتنقلو للإعلان فالسوشيال ميديا. كانت كارثة للصحافة اللي فقدات نسبة كبيرة من التمويل ديالها، وهادشي أثر علينا حتى حنا.

هاد الوضع دخلني فأزمة مالية كبيرة، ودرت الفاييت وخا ما قدرتش نقولها للناس. ولكن بفضل الله وبفضل العلاقات اللي بنيت، كانو ناس وقفوا معايا وتاقو فيا وعطاوني فلوس. ورغم الأزمة اللي كنت غارق فيها، كنت ديما ضاحك قدام الفريق، تنبين ليهم أن الأمور مزيانة باش نبعد عليهم الهموم. الهدف كان هو نخليهم مرتاحين، حيث ماشي ذنبهم أن الكليان ما كيخلصناش، هما دارو خدمتهم وخاصهم يتخلصو فالوقت.

فأواخر 2016، كنا وصلنا لواحد المستوى اللي خاصنا فيه نرتبو الشركة من الداخل. هنا بان صاحبي زهير بهيج لكان خدام فـ Etsy، عرضت عليه يجي يكتشف العالم ديالنا. جلسنا وتناقشنا، وعطاني نصيحة مهمة بزاف غيرات الفلسفة ديال الخدمة ديالنا. خلّتني نعاود نعجن كلشي، ونطور طريقة العمل ديالنا.

هاد الخطوة خلاتنا ننفتحو على قطاعات جديدة وأكثر تعقيد من الصحافة، بحال القطاع الصناعي والصيدلي وغيرهم. بديت نكتشف فرص جديدة فالديفلوبمون، وبدينا نطورو تطبيقات بطريقة مختلفة. بدات مرحلة جديدة من Next Media بعقلية ومشاريع جديدة.

اليوم، وأنا كنشارك معاكم هاد القصة، كنقول لكم أن السر هو أنك تأمن براسك وبالناس اللي معاك، وتصبر وتخدم بالنية، وأن النجاح ماشي هو الوصول، ولكن هو الرحلة بحد ذاتها.

وسط هاد التعقيدات كلها، تلاقيت السيمو لايف. كنظن بغيتي تعرف شنو درنا؟ لا، ماشي YouCan!

#الأربعين #المدير #Lmodir

محمد الغيساني

مؤسس، مستثمر، وكاتب سلسلة الأربعين.