من الدوار لأول 100 دولار.

فدوار ولاد عطو فاش كنت صغير كان المتوقع هو نكمل طريق جدودي وناخذ بلاصتي وسط ولاد عمامي فالفلاحة. ولكن! الله سبحانه وتعالى كان عندو خطة اخرى ليا… خطة غادي تقلب حياتي من الفلاحة لعالم البرمجة وl'Entrepreneuriat.

واحد النهار كان عادي، وغاديا الأمور فيه بشكل روتيني، حتى ڭالت لي الواليدية بلي الواليد الله يحفظو غادي يمشي للمخزن ويخدم فالقوات المسلحة الملكية. هاد اللحظة كانت بداية ديال رحلة غادي تبدل حياتنا كاملة.

قبل ما نفهم أشنو واقع، كنا تحولنا لمدينة سلا من الدور لمفيه حتى حاجة، لوحدة من أكبر المدن المغربية، بحال إلا تحولنا لكوكب آخر. الزناقي مقادين، العمارات عاليين، والطونبيلات تيتسابقو مع بعضياتهم، كلشي كان جديد عليا، بحال لي تولدت من جديد.

فسلا كتاشفت عالم سحري جديد عالم معمري تخيلتو، كانت البوابة ديالو هي السيبير، دوك المشقوف كيما كانت تتعيط عليه الواليدة، كان بمثابة بوابة سحرية لمغارة علي بابا، عامرا كنوز من المعرفة والعلوم، تنعقل على النهار الاول لدخلت فيه لسيبير كنت خايف وفرحان، مفاهمش أشنو هادشي، كولشي حال فمو قدام تلفازة بيضة ويديهوم تيبركو على الكلافي بطريقة سحرية، جاني داكشي بحال تكنا فدوار تنلعبو بحبات الكمح فالحصاد حلاوة فشكل ميمكنش نوصفها.

هاد المغامرة مكانتش ساهلا، ديك الوقيتة كانت الساعة فالسيبير دايرا 40 درهم، وهذا مبلغ كبير، الواليد كان تيتخلص 1100 درهم وعاد كنا كارين ب 500 درهم فالقرية فسلا، تخيلو كيفاش عائلة تتكون من 4 ديال الناس تقدر تعيش الشهر كامل بـ 650 درهم، ولكن لحمد لله كانت البركة.

كل ساعة تندوزها فالسيبير تضحية كبيرة للعائلة. حسيت بزاف ديال المرات بالذنب، ولكن الشغف والإحساس ديالي كان مخليني واثق بلي الله سبحانه وتعالى جابني لسلا باش نكون هنا، وهاد المشقوف هو بوابة المستقبل ديالي.

وجا داك النهار اللي بدل كلشي - نهار شريت أول مشقوف. PC بسيط شراه ليا الواليد بـ 1500 درهم، ولكن بالنسبة ليا كان بحال آلة زمن. كانت Disquette هي صاحبتي، ساعة فالسيبير تتعني الليل كامل ديال المتعة والتعلم. الواليد مسكين كان ديما تيسمعني الهضرة وفبزاف ديال المرات بدون مقدمات تيجي ويحيد البريز باش ننعس.

مع الوقت، بديت تنتعلم كيفاش نصايب صفحة بـ HTML وأول موقع صايبتو كان فيه 400 صفحة، وDreamweaver هو العصى السحرية ديالي، تخيلو فاش كنت تنبغي نعدل حاجة وحدة خاصنا نبدلها بيدي 400 مرة، كنت فرحان وتنعتابر راسي أوعر واحد فالقرية فسلا، ولكن نهار تعرفت على محمد الشريفي بتصرفيقة وحدة حليت عينيا وفهمت بلي راني معارف حتى حاجة، وداكشي اللي كنت تنعتاقد راسي خبير فيه، صدق غير قطرة فعالم ديفلوبمو.

تما بديت تنتعلم PHP، وبديت مرحلة جديدة فحياتي، وليت تنصايب مواقع مزيانة على حساب معايير ديك الوقيتة، وبديت أيضا فعالم الإعلانات، مازال تنعقل على نهار لوصلني فيه أول شيك فحياتي من Google. كانت 100 دولار تقريبا، كنت قربت نبكي بالفرحة، أخيرا هاد المشقوف بديت تندخل الفلوس منو ديك 100 دولار كانت ثروة وتسنيت 3 شهور باش ناخدها.

اليوم، ونا تنتفكر أيامي وتنشوف مسار حياتي تتبان ليا بحال شي كود برمجي طويل ومعقد. كل تحدٍ واجهتو هو بمثابة bug كان خاصني نصلحو، وكل نجاح حققتو هو بمثابة update لشخصيتي وقدراتي.

من دري صغير تيلعب في الدوار إلى الشاب غادي يعوم وسط بحر الكود والخوارزميات، تعلمت أن الحياة عامرة بالفرص بالنسبة لتيعرف كيفاش يغتانمها. وأهم درس تعلمته هو أن التعلم رحلة معمرها تسالي، كلما تعمقت في بحر المعرفة، كلما زدت كتاشفت بلي راه عالم واسع وكبير.

من دوار صغير في المغرب العميق، بديت رحلة وصلاتني لبلايص عمري تخايلتهوم. رحلة علمتني أن الأحلام، شحال مبانت لينا بعيدة، راه ممكن نوصلو ليها بالشغف والخدمة والإصرار. ومازل تنسول راسي: أشنو هو الكود الماجي لغادي نكتبو فقصة حياتي؟

#الأربعين #المدير #Lmodir

محمد الغيساني

مؤسس، مستثمر، وكاتب سلسلة الأربعين.