بغيتي تعرف السر الحقيقي ديال السعادة ؟

ديما كنسمعو الناس كيهدرو على السعادة وكيفاش نوصلو ليها. كل واحد عندو وجهة نظر: شي كيقول فالفلوس، شي فالصحة، شي فالزواج والدراري. ولكن من بعد ما جربت وشفت بعيني، لقيت أن السر فحاجة بسيطة وقليل لتيفكرو فيها: القناعة والرضا.

المهاتما غاندي قالها بواحد الطريقة زوينة: "ثمة أشياء في العالم تكفي لحاجة الإنسان، ولكنها لا تكفي لجشعه." هاد الكلام هزني من الداخل. تصور معايا: واحد الراجل عندو غير 3000 درهم فالشهر، ولكن مرتاح وفرحان، وواحد آخر عندو 300 مليون وكل ليلة كيتقلب فالفراش، كيفكر كيفاش يزيد يجمع. شكون فيهم السعيد؟

نعطيك قصة واقعية: قدام الدار ديال الواليد كاين واحد مول الحانوت، الحاج رشيد. من نهار سكنا فالقرية هادي شي 30 عام وهو فنفس البلاصة. كل نهار كتلقاه ضاحك، كيسلم على الناس، كيسول على الصغير والكبير. واحد مرة سولتو: "كيفاش ديما فرحان هاكا آ الحاج؟" جاوبني بواحد الابتسامة: "ولدي، أنا كنشوف غير اللي عندي، ماشي اللي عند الناس. عندي صحتي، ولادي، والناس كيبغيوني. شنو بغيت أكثر؟"

واحد السيد تنعرفو موظف كبير فواحد الشركة، عندو طوموبيل فاخرة وفيلا تبرك الله، وفين متلقيتو ديما تنلقاه مقلق. كيشكي من كولشي: الخدمة، الطريق, الجيران... حتى العائلة ديالو ما سلماتش منو. كل شهر كيشري شي حاجة جديدة، ولكن ما عمرو حس بالراحة.

سيدنا علي بن أبي طالب رضي الله عنه قالها بواحد الحكمة عظيمة: "لا تنظر إلى من هو فوقك فتزدري نعمة الله عليك." فهاد الزمن ديال الإنستغرام وفيسبوك، ولينا كنشوفو غير التصاور الواعرة: شي كيتصور فباريس، شي شرى دار جديدة، شي كيوري المطعم الفاخر فين تعشى... والأغلبية فينا غير كنتنهدو ونتمناو نكونو بحالهم.

ولكن السر ماشي فهادشي كامل. السعادة فاللحظات الصغيرة: فكاس أتاي الصباح مع الوالدة، فضحكة بنتك الصغيرة وهي كتجري فالدار، فالقعدة مع صحابك القدام فالقهوة ديال الحي، فالعشيوية ديال رمضان مع العائلة... هادو هوما الكنوز الحقيقية.

واحد المرة شفت واحد الفيديو ديال واحد المرأة كبيرة فالمغرب العميق، ساكن فواحد الدار صغيرة ديال الطوب. سولوها واش نتي فرحانة فحياتك؟، جاوباتهوم بواحد الكلام ما عمري ننساه: "الحمد لله، عندي سقف ناعسا تحتو، عندي ماكلة ناكلها، وولادي بخير. واش كاين شي فرحة كثر من هادي؟"

خاصنا نتعلمو منها. نحمدو الله على كولشي، ونبعدو على المقارنات اللي كتجيب غير الهم. نتمتعو باللحظات البسيطة، ونقدرو النعم اللي عندنا. ما عمرنا غادي نكونو كاملين، لحقاش الكمال لله وحده، ولكن نختارو نشوفو الجانب المزيان فأي حاجة قدامنا.

فالختام نقول ليكم: خليو الفرحة تجي من قلوبكم، ماشي من جيوبكم. عيشو نهاركم بالإبتسامة والامتنان. الرضا والقناعة هوما السر، ومنين غادي نفهموهوم، غتفهمو أن الحياة ماشي فاللي كتشوفوه فالتلفون، ولكن فاللي كتحسو به فالقلب. ونتفكرو ديما باللي السعادة ماشي فكثرة الحوايج، ولكن فالقناعة والرضا بداكشي اللي رزقنا بيه الله.

#الأربعين #المدير #Lmodir

محمد الغيساني

مؤسس، مستثمر، وكاتب سلسلة الأربعين.