كيفاش نتعاملو مع الناس اللي كيضرونا فالخدمة؟

واحد الصديق سولني: "شنو المفروض نديرو ملي شي حد كيتسبب لينا فضرر كبير فالخدمة؟ وكيفاش نتعاملو مع الناس اللي كيديرو لينا المشاكل أو اللي كينقصو منا؟"

جاوبتو بصراحة: "كنظن أننا خاصنا نبعدو عليهم ونحاولو نقطعو معاهوم العلاقة، ولكن الصراحة، أنا ما كنقدرش ندير هاد الشي. كنلقى راسي تنحاول ندير الخاطر وكنجاوب فاش تيتصالو بيا، وتنعاونهوم فاش تيطلبو المساعدة"

مجاهدة النفس فهاد الموضوع صعيبة بزاف، وهاد النوع ديال الناس كيتزاد كل نهار. كنعرف أنهم كيهضرو عليا خايب وكيحاولو يضروني، وكيقولو كلام ما عمرني قلتو باش يخصرو صورتي عند الناس، ورغم ذلك كنحاول نتعامل معاهم مزيان.

فواحد المناسبة، كان حاضر معنا واحد السيد كبير شويا فالعمر وباينا عليه القرب من الله، كان تيعطي دروس فالحياة وفالدين، قال لينا: "الله تعالى كيقول فـسورة المزّمّل، الآية 10: 'وَاصْبِرْ عَلَىٰ مَا يَقُولُونَ وَاهْجُرْهُمْ هَجْرًا جَمِيلًا'." وشرح لينا الأية بطريقة عجيبة تقدر تدير ليها الإسقاط على بزاف ديال المواقف تيوجهونا بشكل يومي، وأن المعنى هو الصبر على ما تيقولو الناس، والهجر الجميل هو البعد عليهوم بلا أذية، والتعامل معهم بالحسنى.

سبحان الله، فداك النهار كنت قريت هاد الآية وما فهمتش معناها. والله سخر لي هاد السيد باش يفسرها لي، ويفهمني علاش كنحاول نتعامل معهم بطريقة مزيانة، حتى إلا كانت عندي الفرصة نرد عليهم بنفس الأسلوب وشي مرات بأسلوب أقسح وخايب.

كنقول مع راسي: "شحال صعيب نوصل نتعامل بحال النبي صلى الله عليه وسلم، ولكن خاصنا نحاولو." جهاد النفس صعيب، خصوصًا فالمواقف اللي كتضرنا، ولكن أخلاقنا كتلزم علينا نحاولو نرتقيو بأنفسنا ونتعاملو بالحسنى.

رغم صعوبة الأمر، خاصنا نسعَوا دايما نكونوا نسخ أفضل من ريوسنا، ونتعاملو مع الآخرين بأخلاق طيبة وحسنة.

شحال من مرة واجهتو مواقف بحال هادي؟ كيفاش تعاملتو معاها؟

محمد الغيساني

مؤسس، مستثمر، وكاتب سلسلة الأربعين.