17 يناير: شرارة البداية لحلم جديد

بعد 4 سنوات من الخدمة على YouCan، بنينا فيها أحلامنا وحققنا إنجازات كبيرة. كنا خدامين فصمت، مؤمنين بأن الأفعال أبلغ من الأقوال. ولكن، نهار قريت المقولة ديال الدكتور غازي القصيبي: "من يعمل ولا يسوّق لنفسه، كمن يغمز في الظلام!" حسّيت بأن الوقت جا باش نورّيو العالم شنو نقدرو نديرو.

قررت ننظم أكبر حدث للتجارة الإلكترونية فالعالم العربي وإفريقيا. تحدي كبير، مخاطر عالية، ولكن الحماس كان أقوى. بغيت نخلق تغيير، نفتح أبواب جديدة، ونلهم الشباب باش يأمنو براسهم.

فاش طرحت الفكرة على الشركاء وفريق العمل، تباينت الآراء: البعض خاف من أننا نضيعو الفلوس على الدعاية وفضّل استثماره في البنية التحتية، آخرون شافو أننا خاص نكملو الخدمة بصمت لأن نجاحنا كان نتيجة لذلك. لزوين عندنا: تنتناقشو وتنقلبو على حلول ترضي الجميع، وتنبنيو نقاشاتنا على حسن النية والثقة المتبادلة، وفي الأخير خرجنا بلي غادي نديرو ليفينمو وغادي نتحمل فيه مسؤوليتي، وهوما قالو على بركة الله.

لبست الكاكيسط ديال الماركوتينغ، بديت تنصايب محتوى تسويقي قريب من جمهورنا. غيرنا استراتيجية التواصل بالكامل، واستعنا بـ مؤثرين وفنانين، ومنهم صاحبي الفنان عدنان موحجة، ليكان ليه فضل كبير في إنتاج سلسلة تمثيلية تتقرب الناس من عالم التجارة الإلكترونية. هذه السلسلة لاقت رواج كبير، ودفعت بزاف من الشركات المنافسة باش يتبعونا. الحمد لله، ديما تنصايبو الطريق للآخرين، والهدف هو المغرب، وبغينا كل ما هو مغربي يكون في القمة.

4 شهور ديال الخدمة ليل نهار، وكان المايسترو فيها صاحبي معاذ رزقي، لي دار خدمة نقية فالتنسيق، اللوجستيك، والإعداد للحدث. و Simo Life لخدم على الترويج للحدث بشكل خطير، ومنساش أيضًا صاحبي أحمد توفيق مول النخلة، guichet.ma، لي دار خدمة واعرة وساهم مع جميع شركائنا في إخراج حدث بقي محفورًا في تاريخ التجارة الإلكترونية في المغرب.

شارك فالحدث أكثر من 5000 شخص من المغرب والعالم العربي، وفرقنا فيه أكثر من 100 درع لأفضل الباعة لي حققوا أرقام كبيرة. كان نجاح باهر، احتفلنا براسنا، وبفريقنا، وبجميع التجار الإلكترونيين. كانت فرصة رائعة اكتشفنا فيها المستخدمين عن قرب، وتعرف التجار على بعضهم البعض، وفي ذلك النهار كانت بدات شراكات كبيرة بينهم. الحمد لله، كانت فرصة ذهبية للتواصل وبناء العلاقات.

اللقاء كان عامر بالأرقام، والقصص الناجحة، وفقرات فنية، وكوميديا زادت الفرح للحدث. واختتمناه بمباراة المغرب ضد تنزانيا، التي انتهت لصالح الأسود بنتيجة 3-0. كنا نتمنى أن تنتهي بـ4 أهداف باش تكون فال خير على YouCan، لكن الفوز كان كافي باش نحسو بالفخر. الأهم ديما هو المغرب.

نهاية الحفل، كانت بداية مسار جديد، وجا وقت المحاسبة كما اتفقنا فالبداية، فنحن رجال أفعال وليس أقوال. اجتمعنا باش نتناقشو فالحصيلة، نستخلصو الدروس والعبر، ونتعلمو منها. فبعد كل إنجاز، متنبقوش تنعيشو على الأمجاد، ولكن تنقلبو الصفحة ونوجدو للتحدي الجديد.

لكن، في ديك اللحظة، كان واحد صوت فالداخل ديالي تيقول لي: "كاين ما هو أكبر تيتسناك، كاين تحدي كبير خاصك تدوز ليه..."

هذا النداء الداخلي دفعني لأخذ وقفة، جلست مع راسي وتنفكر في الخطوة القادمة. كنت ناوي تكون هذه الوقفة من أسبوع تال شهر، ولكن استمرت لأكثر من ثمانية أشهر ومازالا لحد اليوم. فهاذ الفترة، تغيرو بزاف ديال الحوايج فراسي وفالمحيط ديالي، وبدأت تجربة جديدة، هذه المرة بعيد على بلادي. وتجولت فأكثر من 5 بلدان أوروبية وخليجية وفي دبي قررت نبدا صفحة جديدة، صفحة غادي نعاود ليكوم عليها قريب.

في دوك الأشهر، شفت بزاف وتعلمت بزاف. تلاقيت بأشخاص ملهمين، شفت المشاريع من الداخل، جلست مع مدراء شركات رائدة، سمعت لتجاربهم وأفكارهم، وتناقشنا في مواضيع متعددة. اكتشفت عالم جديد، عامر بالأفكار والمشاريع المبتكرة. وتما عرفت بلي الطريق ما زال طويلًا ومازال بزاف ديال الحوايج خاصني نحققهوم.

وهنا قلبت صفحة YouCan، وبديت تنكتب فصفحة جديدة، ولكن صفحة السطورا ديالها كلهم أفكار، والتجارب، وأحلام. سطور غادي تعيشو معيا أحداثها يوميًا من خلال وسائل التواصل الاجتماعي.

واش مستعدين للمغامرة الجاية؟

محمد الغيساني

مؤسس، مستثمر، وكاتب سلسلة الأربعين.