عودة بعد طول غياب: بداية جديدة وحماس متجدد

بعد فترة طويلة من التأمل والتفكير، اليوم كنحتفل بعيد ميلادي الأربعين. أربعين عام دازت بحال البرق، مليئة بالمغامرات فمجال ريادة الأعمال والـEntrepreneuriat. فهاد الرحلة، جمعت الحمد لله بزاف ديال الخبرات والدروس؛ منها اللي كان ناجح، ومنها اللي كان درس تعلمت منو باش نقوى ونزيد لقدّام.

كنت غابر على السوشيال ميديا، والبعد عليها كان قرار صعيب بزاف. تحدي خديتو بكل جدية وصرامة، حيث كنت محتاج نوقف شوية، نرتب الأولويات ديالي، ونجدد الطاقة. منكذبش عليكم إلا قلت ليكم أن الإدمان على السوشيال ميديا أصعب من الإدمان على المخدرات! ولكن الحمد لله، قدرت نواجه هاد الإدمان، واليوم رجعت وأنا كلي عزم وحماس باش نرجع أقوى من قبل.

بهذه المناسبة، بغيت نشارك معاكم سلسلة "الأربعين"؛ رحلة صادقة وشفافة فعمق عالم ريادة الأعمال. غادي نبارطاجي معاكم تجاربي الناجحة والفاشلة، النصائح اللي تعلمتها فطريقي، والقصص اللي عشتها مع ناس خدمنا مع بعضياتنا. كان منهم الأمين والشكور، الوفي والمحتال، العفريت والمنافق، وحتى "مسيلمة الكذاب" ديال العصر!

غادي نحكي ليكم كيفاش بدات الرحلة ديالي مع اليوم 24 وسلطانة، وكيفاش قدرنا نحولو فكرة بسيطة لمشاريع ناجحة كتوصل الأخبار والمحتوى للآلاف ديال الناس. غادي نشارك معاكم التحديات اللي واجهناها فـ Next Media، وكيفاش قدرنا نواجهو الصعوبات المالية والتقنية، ونبنيو فريق متلاحم كيآمن بالحلم.

ما غاديش ننسى نحكي ليكم القصة المثيرة ديال YouCan، وكيفاش تولدات الفكرة من لقاء مع السيمو لايف، وكيف تحدّينا المستحيل باش نخلقو أكبر منصة للتجارة الإلكترونية فإفريقيا والعالم العربي. غادي نعاود ليكم على التحديات اللي واجهناها، كيفاش تعاملنا مع الانتقادات، وكيفاش قدرنا نحولو الحلم لواقع كيغيّر حياة الآلاف من الشباب.

بغيت المحتوى اللي غادي نقدمو يكون مفيد وملهم ليكم. هاد الشي علاش بغيت نتشاور معاكم: شنو هي المواضيع اللي كتهمكم فمجال ريادة الأعمال؟ شنو هي التحديات اللي كتواجهو دابا؟ خليونا نتعاونو جميع، باش تكون العودة ديالي نقطة انطلاق جديدة لينا كاملين نحو النجاح.

الحماس ديالي كبير، والطريق مازال طويلة، ولكن بالإرادة والعزيمة، ما كاينش المستحيل!

#الأربعين #المدير #Lmodir

محمد الغيساني

مؤسس، مستثمر، وكاتب سلسلة الأربعين.